“School 21” AT ta’lim maktabi va Inha universitetining talabalariga yangi, zamon talablariga avob beradigan yotoqxona foydalanishga topshirildi

Toshkent shahridagi “School 21” AT ta’lim maktabi va Inha universitetining talabalar va Respublikaning turli hududlaridan kelib axborot texnologiyalarini oʻqib oʻrganmoqchi boʻlganlar uchun yangi, zamonaviy va barcha talablarga javob beradigan yotoqxonasi foydalanishga topshirildi. Ochilish marosimida Raqamli texnologiyalar vaziri Sherzod Shermatov ham ishtirok etdi.

Marosim doirasida vazirga yotoqxonada yaratilgan sharoitlar, xonalarning jihozlanishi, xavfsizlik tizimi, dam olish va o‘qish uchun qulay muhit haqida batafsil ma’lumot berildi. Vazir Sh. Shermatov yotoqxonani ko‘zdan kechirib, xonalar, maishiy sharoitlar, sanitariya va gigiena talablariga to‘liq javob beruvchi infratuzilma bilan yaqindan tanishdi.

Ushbu yotoqxona 472 nafar talabaga mo‘ljallangan. Yotoqxonada talabalar uchun barcha sharoitlar yaratilgan, jumladan, dam olish xonalari, o‘quv burchaklari, sport bilan shug‘ullanish uchun mo‘ljallangan maydonlar, turli to‘garaklar va boshqa qulayliklar ham tashkil etilgan.  Birinchi qavatda 60 dan ortiq kishiga mo‘ljallangan zamonaviy kovorking, guruhlarda ishlash uchun alohida muzokaralar xonasi tashkil etilgan.

Vazir o‘z tashrifi davomida talaba yoshlar bilan samimiy suhbat o‘tkazdi, ularning o‘qish jarayoni, kundalik ehtiyojlari va takliflarini tingladi.

Vazir yotoqxonadagi shart-sharoitlarni ijobiy baholab, talabalarning o‘qish va shaxsiy rivojlanishi uchun yaratilgan imkoniyatlar muhim ekanini qayd etdi. Ushbu infratuzilma yoshlarning nafaqat ta’lim, balki madaniy-ma’naviy va jismoniy faolligini oshirishga xizmat qilishi ta’kidlandi.

Ushbu yangi yotoqxonaning foydalanishga topshirilishi Respublika hududlaridagi yoshlar uchun Toshkentga kelib, “School 21”da o‘qish va mazkur zamonaviy sharoitlardan foydalanish bo‘yicha qo‘shimcha imkoniyat yaratadi.

Yoshlar o‘zlarini IT yo‘nalishida sinab ko‘rish, bepul o‘qish va xalqaro standartlardagi loyihalarda ishtirok etish uchun School 21’ga kelib o‘qishlari mumkin.

School 21 ishtirokchilari dasturlash yoki raqamli texnologiyalarning boshqa sohalarida amaliy ko‘nikmalarini tasdiqlovchi asosiy yoki yuqori darajali davlat namunasidagi diplomga ega bo‘ladilar. Ushbu hujjat mehnat bozorida raqobatbardosh ustunlikni ta’minlab, IT yo‘nalishidagi yirik kompaniyalar va yuqori texnologiyali sohalarda ishlash uchun imkoniyat yaratadi.

Yaratilgan vaqt: 21.11.2025

Ko‘rishlar soni: 30